MBUNGE BUTONDO ATOA VIFAA VYA TEHAMA KUUNGA MKONO SEKTA YA ELIMU KISHAPU

Posted on: May 26th, 2025

Mbunge wa Jimbo la Kishapu, Mheshimiwa Boniphace Butondo, ameendelea kuunga mkono juhudi za Serikali ya Awamu ya Sita katika kuboresha sekta ya elimu nchini kwa kukabidhi vifaa vya Teknolojia ya Habari na Mawasiliano (TEHAMA) katika shule za sekondari Ngofila na Lagana.

Zoezi hilo limefanyika jana katika shule hizo kwa nyakati tofauti, ambapo Mbunge Butondo aliambatana na Mwenyekiti wa Chama Cha Mapinduzi (CCM) Wilaya ya Kishapu, Shija Ntelezu.

Akizungumza wakati wa makabidhiano hayo, Mheshimiwa Butondo alisema lengo la msaada huo ni kuunga mkono jitihada za Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan, katika kuinua kiwango cha elimu kwa kuwezesha wanafunzi kujifunza kwa vitendo na kuongeza ufaulu.

“Vifaa vya TEHAMA nilivyokabidhi ni pamoja na printer, seti kamili ya monitá, CPU na projector. Vifaa hivi vitasaidia kuinua taaluma ya wanafunzi na kuboresha mazingira ya kufundishia na kujifunzia,” alisema Butondo.

Aliongeza kuwa vifaa hivyo vitarahisisha kazi kwa walimu katika maandalizi ya masomo na uchapaji wa mitihani, hivyo kuondoa utegemezi kwa vituo binafsi vya uchapaji na kupunguza gharama za uendeshaji.

Mbunge huyo pia alitoa maelekezo kuwa vifaa hivyo vitunzwe kwa umakini, mazingira ya matumizi yawe safi, na kusisitiza uanzishwaji wa somo la Kompyuta katika shule ya sekondari Lagana ambayo kwa sasa haina somo hilo.

Mkuu wa Shule ya Sekondari Ngofila, Bi. Matrida Mwaliaje, alieleza kuwa upatikanaji wa vifaa hivyo ni chachu ya kuongeza ufaulu, kwani sasa wanafunzi watakuwa wanapatiwa majaribio mara kwa mara ili kutathmini maendeleo yao ya kitaaluma.

Amesema vifaa hivyo pia vitapunguza gharama na adha ya kusafiri umbali mrefu hadi shule za Kishapu na Ukenyenge, zilizoko zaidi ya kilomita 60, kwa ajili ya kuchapisha mitihani.

Kwa upande wake, Mkuu wa Shule ya Sekondari Lagana, Bw. Adam Malongo, alishukuru kwa msaada huo akisema ni mchango mkubwa katika kuinua viwango vya elimu shuleni hapo.

Baadhi ya wanafunzi, wakiwemo Hadija Pambe, walionesha furaha yao kwa kupatiwa vifaa hivyo, wakisema vitawawezesha kusoma kwa vitendo na kufanya majaribio ya mitihani mara kwa mara.

Naye Mwenyekiti wa CCM Wilaya ya Kishapu, Bw. Shija Ntelezu, alitoa pongezi kwa Mbunge Butondo kwa kuendelea kutekeleza kwa vitendo Ilani ya Chama Cha Mapinduzi, hasa katika sekta ya elimu.

Hadi sasa, Mbunge Butondo ameshakabidhi vifaa vya TEHAMA katika shule tatu za sekondari jimboni humo, ambazo ni Kishapu, Ngofila na Lagana.