REDESO NA CARE INTERNATIONAL WAWEZESHA WAKULIMA WADOGO KISHAPU KUPITIA MRADI WA UFUGAJI WA KUKU NA ZAO LA MKONGE

Posted on: May 30th, 2025

Katika kukabiliana na changamoto zinazosababishwa na mabadiliko ya tabianchi, Shirika lisilo la kiserikali la Relief to Development Society (REDESO) kwa kushirikiana na CARE International, limeendelea kuwawezesha wakulima wadogo wilayani Kishapu kwa kuwajengea uwezo katika mnyororo wa thamani wa kilimo cha mkonge na ufugaji wa kuku wa kisasa.

Akizungumza wakati wa ziara ya mafunzo kwa wakulima katika vijiji vya Isoso na Negezi Mei 29,2025 Meneja Miradi kutoka REDESO, Bw. Charles Bulegeya alisema kuwa mradi huo unalenga kuwawezesha wakulima na wafugaji wadogo kwa kuwapatia elimu ya vitendo na mitaji midogo ya kuanzisha shughuli za uzalishaji zenye tija.

Meneja miradi Redeso Kishapu Charles Buregeya(kushoto),afisa wa Redeso Kishapu Erica Karuta (katikati) na afisa mradi Care International Wilfred Makombe(kulia) 

“Tunatoa mafunzo ya mbinu bora za ufugaji wa kuku chotara walioboreshwa, wenye uwezo wa kustahimili magonjwa, kukua haraka na kuongeza kipato. Lengo ni kuwajengea uwezo ili nao wawe wawezeshaji katika jamii zao,” amesema Bulegeya.

Afisa ugani wa Halmashauri ya Wilaya ya Kishapu Mkoani Shinyanga Kalekwa Mtoni na mwezeshaji katika semina iliyoandaliwa na Redeso Kishapu kwa kushirikiana na Care International katika ukumbi wa Veta Wilayani humo Mei 29,2025

Mafunzo hayo yamehusisha pia ziara za mafunzo kwa wakulima kutembelea miradi iliyofanikiwa ili kujifunza kwa vitendo, kubadilishana uzoefu, na kupata motisha kutoka kwa wenzao waliofanikiwa katika ufugaji wa kuku na kilimo cha mkonge.

Afisa Mifugo wa Halmashauri ya Wilaya ya Kishapu, Bw. Kalekwa Mtoni ambaye pia ni mmoja wa wawezeshaji wa mafunzo hayo, amesema kuwa mradi huo unatekelezwa kwa kushirikiana na Halmashauri ili kufikia lengo la Mkurugenzi wa Halmashauri, Bw. Emmanuel Johnson, la kuwawezesha wananchi kujikwamua kiuchumi huku wakiboresha lishe katika familia zao.

“Tumepewa elimu ya bure yenye thamani kubwa, ni jukumu letu kuitumia vizuri kwa ajili ya maendeleo ya familia zetu na jamii kwa ujumla,” amesema Mtoni.

 Diwani wa Viti Maalum Kata ya Ukenyenge, Mhe. Josephine Malima, amewapongeza REDESO na CARE International kwa juhudi zao za kuwawezesha wananchi kupitia elimu ya kilimo na ufugaji wa kisasa.

Meneja Mradi kutoka CARE International, Bw. Wilfred Makombe, amehimiza wanakikundi na wawezeshaji kutumia rasilimali zilizopo kuanzisha miradi badala ya kusubiri mazingira bora yasiyopatikana kwa urahisi.

“Tumeshuhudia mafanikio ya wanakikundi kutoka Negezi na Busongo waliotumia vifaa vya kawaida kama bikobiko, lakini sasa wananufaika. Hatupaswi kusubiri miundombinu ya kisasa ili kuanza,” amesema Makombe.

Baadhi ya wanufaika wa mafunzo hayo, wakiwemo Suzan Ezekiel (Busongo), Rahel Charles (Mihama), Reuben Nestory, Fredina Said (Negezi), na Lata Pungu (Kakola), wameeleza mafanikio yao baada ya kushiriki katika mradi huo.

“Tuliona ufugaji wa kuku ni jambo la kawaida, lakini sasa tunapata kipato cha kusomesha watoto wetu na kuboresha lishe. Kuku ni mfalme!” amesema Suzan Ezekiel, Katibu wa Kikundi cha Muungano, Busongo.

Mradi huu wa miaka mitatu ulioanza mwaka 2023, unatekelezwa na REDESO kwa ushirikiano na CARE International katika vijiji 10 vya Wilaya ya Kishapu ambavyo ni Shagihilu, Mihama, Busongo, Negezi, Uchunga, Kakola, Lubaga, Bubinza, Isoso na Unyanyembe. Mpaka sasa mradi umefikia asilimia 98 ya utekelezaji, na kwa sasa zaidi ya vifaranga 2000 vya kuku chotara huagizwa kila mwezi.